Chachani - mein erster 6000er

Ob dirs gloubet oder nid, ig bi letscht Wuchenänd ufemene 6000er gsi. Dä heisst Chachani und giltet aus eine vo dä liechtischtä 6000er vor Wält (süsch wäri ja äuä o nid uechecho..:-)) Es isch ä ehemalige Vulkan.
Auso dä Bärg dä ligt ir Nechi vo Arequipa, das isch ä wunderschöni Stadt ä 10 stündigi Busfahrt vo Cusco entfernt. Zersch mau äs paar Bildli vor Stadt:

Am Busbahnhof in Arequipa

Vorem Plaza de Arma

Hie gseht mä üses Ziel!!

Peruanischi und Arequipanischi Flagge!

 Mir si ziemlech unorganisiert a das Wuchenänd härägange. Eifach mau nach Cusco gfahre, dert gluegt ob irgend ä Bus nach Arequipa fahrt - mir hei eini gfunde und si am Morge ds Arequipa gsi. När heimer äs Reisebüro gsuecht um ds luege ob üs öpper uf dä Bärg würdi füehre...Gott isch mit üs gsi, bim erschtä Stopp hets scho klappet! Mir hei ä guete und erfahrnige Füehrer becho, wo ir Hochsaison bis zu drü mau ir Wuche uf dä Bärg geit!!:-)
Am achti am Abe isches när du losgange, u zwar mitem Jeep über Stock u Stei 2,5 Stund dr Bärg desueche. Dr Chachani isch ja o drum so liecht, wüu du fasch bis uf 5000 Meter uechefahrsch... När simer öppä 1,5 Stund gloffe und am Basiscamp acho - dert heimer churze Zwüschestopp gmacht u när isches 6 Stund dr Bärg desuf gange, bis mir ufem Gipfu si gsi.

Öppis warms trinke im Basiscamp - d'Temperature si bi -10 Grad und töifer gsi

Üsä Füehrer - ä sehr luschtige und erfahrnige Maa!

Olga - eine Freundin von Erika u ig!

Über Vulkanasche - so isches sehr lang uechegange

Ufem Wäg het üs d'Sunne begrüesst

Äs chlises Pöiseli für Müesliriegel ds ässä!

Die zwei Kämpfer die es bis zum Schluss geschafft haben -
mithilf vo Cocablätter kauen, das git dir ächt Chraft!!

äs igfrornigs Bärgbächli uf 5950m.ü.m.

Ufem Gipfu!!



Ussicht uf Arequipa



8.30 Morgens - äs Föteli mitem Gipfelchrüz

Glücklich und zufrieden......



Ufem Wäg nach unge!



Ein bisschen K.O. simer scho gsi

Isch ja nach zwölf Stund loufe ou erloubt...

Insgsamt simer aber glücklech und stolz!!

Ja, und am Suntig Mittag simer när wieder mitem Jeep id Stadt abe und si di ganzi Nacht mitem Bus düregfahre, irgendwenn am Morge früech in Cusco acho, mitem Taxi nach Curahuasi gange und diräkt, ohni zersch no hei dsgah, gah schaffe! Äs isch ächt äs aschträngends, aber wunderschöns Weekend gsi!!